هوه الشباج
(هوه الشباج )
معروفين من بعيد
بالغربة جناسينه ولا تنجاس
شسولف عن حلم باجر
إذا مر وتشوف الناس
يا باجر شمسنه تدور
من توصل الخصر الكاع
مثل ما دار بينه الكاس
وحته الكمر بالمنفى
غريب مسير وي ليل
ماشايل ضوه وأحساس
والكلبه ثلج ابيض
تشيل الغربه من لونه
وتحط عالراس ..
ليليه ألم كل الصور وأفتح هوه الشباج
ويردلي صده من الصوت
حزنك خضر ويه اليأس
ليليه الندم بطراف اصابيعي
يفز ويطشني عل وهوواس
ليليه حلم ياخذني عالديره
واشوف الناس هم مثلي
محتاجه لوطن ينباس
ارد والكه الوطن بس وحشه
وصريخ الثكالة تسكت الاجراس
ارد والكه الوطن منهوب من عينه
الكحل والناهبه الحراس
وخوف بوجهي يلبد والعيون تفضي
وطن بي ضاگت الأنفاس
ارد والكه المحطات ..
وجدم كلش ثمل
يطوطح وثگلان .
.
ارد ولكه سراكي البوب
مابيهن إثر دافي
التعشگه برودة الحيطان
ومخضره سراكي البوب ..
من كثر التراب
النام عل بيبان ..
والشارع حزين
وخالي من كلشي
وطفه بروحه الضوه.. ونعسان
من كثر السهر عيني
جثث زرگه ترسها الليل
وشراع الجفن ذبلان
والمنفى اليلم غربه
ولا لم الوطن بالشوف
من غنيت راح انساك
والهلهوله النحبها تشح بينه
مثل طيوف شحت
درب لملاكاك ..
وابقى آنه وحنيني
وشوك المتانين ..
واصرخ بلكي ارد وألكَاك
أرد بس روح وتوجه
عل الحيطان
معقوله الوطن مو ذاك؟
اي هذا الوطن مو ذاك ..
دث فوك الجفن
بس الندى التاناك
اشوف الوطن گايدني
ودرابين العشك ترفه
وعليها.. مسامر الضحكات
كايدني.. لمحلتنه
وعلى زلوف البنات
الشكر والحلوات
كل هاذا وعلى القمصان
تلكه الوطن والوانه
حزين ايبات .
بقلم
حسين عباس
البصرة
الله الله الشاعر النغي والجميل حسين عباس الدراجي كل التوفيق والحب الك…
مبدع حبيبي