وحدك الخسران
(( وحدك الخسران))
==========،كريم الرسام بقلمي
لا تحجيلي عنك حافظك كلك..
ما أشتبه بيك مغمض اندلك.
حفظتك مثل اسمي شلون اغلط بيك..
اصلا مو صعب كلش سهل حلك..
جان من البدايه تكلي طبعك هذا
يجوز أحسن الي وانته اسهلك.
زغرت بعيني كلش روح الله وياك
حسبالي كبل بالذهب ماابدلك.
تحملتك هواي وكلت بلكي تعود.
انته بهل العناد شعندك وشلك.
انه براسي حجي مو سهل من احجيه.
راح اسكت لان ادري الحجي يذلك..
بتفكيري كلت ماتختلف وياي..
تره مجبور لمن جنت اسكتلك.
لان عندي سوالف مال تالي الليل
كلي بياهي منهن حتى اغفرلك.
شاماتك كبل نحسبهن انه وياك..
على ياشامه منهن رايد اشرحلك.
انه مشغول بيهن اظل طول الليل
تأشرلي عليهن قبل مااسالك.
اتعجب عليك بسرعة تنسه الصار
تذكر باذانك جنت شهمسلك .
من كتلك احبك صادق انه وياك .
والمني خذاك… شرايح يكلك.
عجيب تغيرت مابين ليله ويوم..
لو باقي عليه هواي احسلك..
جنت شاغل حياتي بس افكر بيك
ماتلكه اليحبك مثلي ويجلك.
فضلتك عليه برغم كل البيك.
لان كلب اليحبك جذب مايملك
انته احساس بيه بكل وكت موجود.
وماتحتاج يمكن حتى اصفنلك.
انته ابالي باقي شما تروح بعيد.
لان ادري شوكت مااريد اوصلك.
تره انته سبب كل قلق بيه يعيش
لكن تستمر ما رايح اسمحلك.
انه وياك باقي لاخر المشوار.
اتحمل عذابك وابد مااملك..
لا تبقى بعنادك وحدك الخسران.
كلش سهله الله وياك اذا اكلك ..
اذا هذا اختيارك وانتهى الموضوع
حتى الحب بعد هيهات يشفعلك