قصيدة عامية(ويطعموك هما البلا)
قصيدة عامية(ويطعموك هما البلا)
آخر لقانا كان عفي
فيه الوداع
وقدر يفرق بينا
باقتدار
وجه الخداع
اللي ملى قلبك
خلاص
باشت ملامحه وقتها
وظهرت بالوش الحقيقي للنفاق
يا ميت سلامه
بتصحبك
وتسحبك
لابعد
ما يتصور خيال
خليك بعييييييد
ماترجعشي
وكفايه إن قلوبنا فرغت
م السذاجه
وم العبط
وقدرنا نفهم
إن زرعك
أصله من زرع الشيطان
تضحك لنا
ونلف
تطعن ضهرنا
بسم انتشاك
واحنا بغباء
كنا نطبب فيك جراحك
لما تشكي
أو تنوح
أو تبكيك الحياه
ياااااااااه
ياه ع الوداعه
لما تتمسكن قصادنا
فنهب نحضن فيك
براءتك
و بسرعة نفرش لك
ف روحنا
سرير
وقلوبنا
لرجولك مداس
ياااااااه
هي دي ناس
أبدا
دي مش زينا
ولا جوا ف صدورهم
قلوب
تعرف تصون
معنى الوفاء
ملعون أبو الطيبة
اللي زايده ف دمنا
ومافرقتش لحظه ف وشنا
بين الخداع
والانتماء
ملعون أبوها الأنانا
قتلت صفاء الأزمنه
و معدش فيه
إلا
زمان المصالحه
تخلص
فنرمي كل حاجه كويسه
وندور نلسن
على الوفي
بكل افترى
وكأنه من سلسال
أبليس
وقت اعتراضه لربنا
حاجه مقرفه
إنك تعيش
ف وسط غابة
وكل من حولك وحوش
ورتوش بسيطه
ع الوشوش
تضحك عليك
وتمد إيدك للسما
تقطف لهم
عناقيد سلامه
ويطعموك هما البلا
بلاوي بنشفنوها
بإسم البشر
واجب علينا من النهاردة
نعيد حساباتنا القديمة كلها
ونكمل المشوار
بكل حيطه
وألف معنى
للحذر.
.بقلم
عصام عبد المحسن
مصر