طبع الذهب
(( طبع الذهب))
بقلمي
لاتهدهن بسرعه يفحط المركاض
مو كلمن تهـدهه أمأصـله وتغلب
عـت اعنـــانهن لا يـاخذك طغيان
تكظ صدر العزوم الريح من تهب
مو كل اليطكن فشك مخطورات
اكو بعض التفك جيـلاتـهن خلب
مو هسه أترهه وتطـفح بـلا روج
احـبهه عدل لا أتيـه من تحسـب
لايغشك ضرعها يجوزمامضمون
من يشف صدرها بدلوك شتحلب
لاتظل أتشلبهه الهاويات اهـواي
تشلعهه بجذرها الريح من تغضب
خليهه بتبنــهه ولا تكـظ مــرواح
لا تذري التــراب وكافي لاتـكلب
مو كلمن يمرحب من كلب ولسان
تأكد من جبيلك كبل مــا تجهب
شمااشوفك قلق وبداخلك مهزوز
وبدفتـر اوهـامك جذب لا تكلب
بهدومك نفـط لا تــكرب من النار
شـــتلحك عليهه النـــار من تكب
أذا سدك رخو لا تلاوي صدر الروج
ياكل بـالجروف الروج من يكرب
اصلا مو لغز حتى انه ادوخن بيك
متأكد برايي واعرف شـــأشطب
مرات الحجي بيـه غالب ومغلوب
بس كلك خسـاره وابــد ما تغلب
حط جدمك بكاع وانعل الشيطان
ليش من العدل والصدك تستغرب
من طبع الذهب ما ياكله الزنجار
يبقه بنفس شكله ولونه مايكلب
لا تراوغ ابطـــعك لاتظل حـرباء
فكر بالحليم شـلون من يغضب
كل واحد العنده نحطها بالميزان
اريد اللي عليك وانته مــا تطلب
فاض الصبر بيه وكلبي جاسه الغيض
كمت اجد شــرار بصفي لاتكرب
موقصدي انه احذرك خايف من البيك
كلت ظهر الحملهه وطلـعت العكرب
ما يبقه بظهرهه الما حسبهه احساب
حسبها حساب حيدر خيبر ومرحب