أنه احبك
(( أنه احبك ))
أحببتك لأنك قدري
بقلمي=========== كريم الرسام
راح اسولفلك علي بس مااريد
تعتبر حبي الك نقطة ضعف.
مدري ليش أضعف واخافن من اجيك
ومن اشوفنك أظل كلي ارتجف.
اصفن وتاخذني لبعيد الظنون.
واسكت ومااكدر انطق اي حرف
لان خليتك بدراسي وادري بيك..
راح امشي وياك باخطر منعطف .
هذا واقع حال لاتصدك اخاف.
ونهر حبك ابد لاتصدك يجف
انته بعيوني امل باقي تعيش.
وقبل مايسالوني طبعا اعترف.
بعقلي ما امشي لان كلبي الدليل
كلبي من يحب صعب كلش كلف..
انه حبيتك نعم….. طبعا اكيد
مااريد يكون حب بس من طرف
انته بادلني فقط نفس الشعور .
مو صحيح وياي اذا تدور وتلف.
انه ما احبها المشاعر بس كلام ..
وابد ماتعجبني اذا بيها عطف.
احلى ما بالحب اذا كله الوضوح
ومو صحيح نكول يحكمنه ظرف
اليحب يضحي اذا حبه صحيح.
كون باحساسه وكلامه يظل ترف
انه من كتلك احبك شي اكيد..
وحبي لازم طبعا يفوق الوصف..
واثق بنفسي من اسولف واحجي بيك
من دخلت بكلبي لا ما تنحذف.
وانته وحدك بالكلب مالك شريك.
ماكو غيرك بس الك كلبي يرف .
كون نفس احساسي هذا البيه بيك
مااحب تكون بس اسمك ولف..
الحقيقه احساسي فايض بس عليك
ما تجي وياي… واحد بالألف.
انه اريدك كون ماتبقه بعيد.
كون احنه تصير جن ماي وجرف
كون خطوه بخطوه نمشيها بامان
يبقى كل تفكيرنا بنفس الهدف..
ونبقى انه وياك وبنفس الشعور
مااحب يومين وتضيع العرف.