اشكثر مرو دربنه ناس راحو
اشكثر مرو دربنه ناس راحو
كلمن راحله الدنيه ومشه بصوب
مرو جن حلم مر بدرب نوم
وتركو جمر يلهب بين الكلوب
ابليلي اشكثر سهرت لجلك نجوم
بعد ماشمس عمرك طمهه الغروب
وتغطت بين روحي جروح متنام
وتركت شموع عمري بلا رجه تذوب
مامر الصبح بدروب عميان
ولافك الضوه لعيونهم بوب
واجيتك من بعيد اركض وفحطان
حسبالي الوكت رداك الي انوب
اثاري الماله قسمه بفرح دنياه
يظل طول الوكت والعمر متعوب
وثاري الفرح مايندلي عنوان
ولا لاكي اعلى روحي توصل ادروب
واثاري الماله واهس مره دنياه
وثكيل يمر عليه الوكت ويلوب
حلاة الدنيه من تتصافه وياك
ولك بيهه وطن ووياك محبوب
مو سر السعاده مال لو جاه
ولا البيت الجبير وواسع البوب
اذا مرتاحه نفسك والتحبه عايش وياك
هاي اكبر سعاده تحسهه الكلوب
ورضينا بكلشي بس الوكت ماراد
خذانه وياه كوه ال اتعس ادروب
ونزعنه شكو من شي لبسناه
ومشانه عرايه بدون ماثوب
(ومشينه وياه)
مصدومين بس حسبالنه بنوم
وعلى الشمات فرنه بكل الادروب
اويلي اعلى الدهر من يغدر انسان
ومن يعكس وياه ويمشي مكلوب
جويت الكلب ونهيته مرات
بس ماقبل مني ولا رضه انتوب
عساهه اببخت كلمن رادنه انطيح
وعان الوكت ضدنه ومالنه اذنوب ..!!
بقلم
المار العبيدي