من أغتاض
من أغتاض
من اغتاض عن الهوى
اطرد شكو بريتي
وأترس الدنيه حزن
لوسولفت دمعتي
كهوه اني مره نعم
بس عايش ابهيبتي
أتشابه ويه الورد
دوم النده بكصتي
عايش غريب ابوطن
ماجني ابن ديرتي
وزعت كلشي وخلص
ماباقي بس صفنتي
بصفنتي دوله وعلم
تتباوس ويه القلم
بيها البلابل سوه
مو شجرته.. وشجرتي
مابيهه جندي وسجن
علمها حب الغصن
لامات بلبل عشك
ينزل علم دولتي
هذه اني طبعي سهل
بس ياسهل ممتنع
لا يوم شايل سهم
لايوم لابس درع
بالليل نخلص سوه
اني وعمر شمعتي
بجكليته حيل اقتنع
شايل قناعة طفل
وأغسل عيوني بدمع
ماغسلتها ابكحل
لاعاشرتلي صعب
لادورت عن سهل
رغم آني حتى الهوه
يدري بأمس حاجتي
واستاذن من الهوه
لورت اودع العمر
وتنوري طين وعلي
بس بي رهاوة قصر
ميراثي ومضة شعر
بيتين طابو فقر
هذه اني وضعي ابد
ماقصر ابدنيتي
لكني طبعي ترف
للمجفي اصيحن هله
وماصير منجل ابد
لو ماصرت سنبله
امشي بطريق العدل
ممشه على كد خطوتي
ماطالبتلي ابفضل
اليكتلني ورده الفصل
ماشد عداوه ابد
شدة ورد شدتي
بس اني عكس البشر
يرجع لون يندفن
يخضر بلهفة عشك
ويعيش صافي ذهن
ماعندي حن وانه احن
للمايحن هم احن
ياس وحياتك مشو
عافوني كل صحبتي
لكني كشخة سلف
رغم اني عايش فرد
ماكول جنت وجنت
وطرق ابواب السرد
معروف عن طيبتي
للصيف اضمن ابرد
لشتاي اضمن دفو
هذه اني كل قصتي
بقلم
علي الصفراني