روف جرحك
روف جرحك
روف جرحك
خلي ايدك فوك جتفك
طبطب بجفك عليك!
اوكف كبال المراية
وﻻ أتاني أحد يعينك
انت ل ايدك مد اديك !
وجع هسه. ..اتعوفه هسه
وكون تضحك
كون باجر كل حزن مايبقى بيك
كون باجر
يكشخ السوك بحﻻتك
باكة جوري وبس فراش اليعتليك
وحتى إذا عافوك ربعك
انت كل شويه مر ضيف عله روحك
ﻻ أتاني أحد يجيك
عادي خيبيعونك احسن
انت هسه بعازتك
روح اشتريك
سوي من نفسك وطن
يختلف عن هذا الوطن
والمايحبك راح تلكاه يعتنيك
وكلها تكضي
الناس، ،والدنيا
عليمن جا بعد مهتم؟ ؟!
عليمن بالصدر تنور
وبراسك دوي ودخان
جن بيك انفجر منجم!
يالمصيوب
ﻻ تتمنى بس اتموت
يمكن لو متت تندم
إذا ما تنجرح وأطيب
جا ليش الله حطلك دم؟ !
جا ليش الدمع مسجون ؟
هم من حقه
يطلع للهوه ويشتم
حالك حال ناس هواي
ﻻزم تختنك ،،واضوج
تخسر، ،تغلط،،و تنهم
انت انسان
من تنكسر رد وكوم
مو جامة وصعب تلتم
جم ليلة الحرب
بس من ترد مهيوب
هيبة السيف المثلم
وبعد كلهن ترد ذاك الحلم
بعيون كلمن بي جنت تحلم
ترد تنمدح من إشفاف
عشت اسنين من اصحابهن تنذم
ويجيك الطاعنك
ويكلك شمحتاج؟
-ما تحتاج “طعنه ” وكله ﻻ تسلم .
بقلم
سيف سعد لوش
المولى