قصيدة روح
( قصيدة روح)
هِمِتْ بيك وضاعت الروح بهواك
أوﭼِـنْتْ أظن طول العمر توفيلي
صَدَّگـِتْ .. من گِتْلِي نجمه آنه بسماك
وﭼـِنِتْ أطرب حيل من تحـﭼـيلي
تَيَهِتْ رايي وگـمت أركض وراك
أوْ وَيْ صورك ﭼِـنْتْ أَخَلّصْ ليلي
يَلْ عفتني وگـوطَرِتْ وآنه برجاك
يَلْ خَذِتْ روحي وخَذِتْ كل حيلي
ﭼـِنْتْ أكِلَْكْ …
رِدْلي لِمْ ارويحتي شمالك شجاك
إِزْغَيِّر احسبني وﭼـذب ناغيلي
روحي عَذَّبـْها اشكثر ياخِلْ جفاك
ميته روحي وتحيا بس توميلي
يل بعت روحك رخيصه اعله الشراك
يل طحت من عيني مو غربيلي
وهَسَّه أَگـِّلَكْ …
روح .. دَوُّرْ .. خِلْ يكون ابمستواك
وِحْذرْ اتردلي ونَدَمْ تبـﭼـيلي
باﭼـر إِيْعوفَكْ تَرَه الــْ مِنّي خذاك
وأدري ترجعلي وزحف تمشيلي
لاﭼـَنْ إحْـذَرْ يل ألف سوده ابگراك
صافي صار أومَيِزَكْ دربيلي
صح عشگتك من زغر سن الــ صِباك
وصح مسحت ادموعك ابمنديلي
بس وحگ اعيونك وطولك هذاك
الــ بي صرت مجنون ليله إبليلي
من تردلي وتعتذر وتگلي هـاك
راح أگلك هاكك اشتوفيلي
روح رد الولفك الــ مني خذاك
انت مِـبْحـِرْ مايلمك نِيلي
گلبي ذاك الهايم بشوگك نِساك
عيش دنيه العجبتك وإدعيلي
يَلْ بِعِتْ روحك رخيصه اعله الشراك
يَلْ طِـحِتْ من عيني مو غربيلي
يَلْ طِـحِتْ من عيني مو غربيلي
بقلم
نعيم مشكور الطائي