قصيدة اضحك اضحك
( قصيدة اضحك اضحك)
اضحك .. اضحك
رغم ليل اعداك وهموم
الزمان وطرَّه صُبْحَكْ
اضحك بعين الصَلافَه
أوسِنـَّكْ إبطرف الشفايف خَلَّه ينحك
وإبـﭼـي بنصاص الليالي
خاف دمعاتك تفضحك
وإخذ عبرة عمر وإمشي
وتدري ملـﭼـوم الينصحك ..؟
اضحك .. اضحك
انت موش أول يتيم
اليَتِمَه امن الزغر وكته
آنه گبلك راضع الهم
اويه گطرات الحليب ومره ضگته
ﭼـنت ألولي النجم ليلي
يطفي ضوياته وينام وليلي مافد يوم نمته
آنه عشت اسنين گبلك
انطحنن إبرَّحَةْ زماني وكلشي جربته وعرفته
جَرَّبِتْ صاحب وكتنه حده
وي حد الحلاوه ايطير لو خلص لحسته
وكلشي شفته .. !
شفت صاحب …
يحـﭼـي وي توأم حياته .. إيگله احبك
وشابگه وعينه اعله اخته
وشفت ناس الباعت الغيره اعله مامش
وشفت ذاك الباع روحه
ورد عرض بالسوگ ذمته
وشفت ناس التطعن بعرض اليتيمه
ومامش ابن اجواد بيهم كلهه صنته
وبعد كل هذا ويگلك خلهه سكته
وآنه هم أرجع وأگلك خلهه سكته
ارجع وعاين لوكتك ..
ياهو من هم الوكت مالاحه هم
وياهو خلـَّصْ عمره راحه
ومابــﭼـه من الضيم دم
وياهو بينه الماجرع مر الليالي
أويه مرهه انخبط سَمْ
وياهو بينه الماصفه بدنياه نكته
وكلشي شفته .. وخلهه سكته
إدفن السر ابدليلك .. تدري ماغيرك يصونه
وتدري ينباع اعله غيرك
لو غلطت ومرًّه بِعـْته
آنه وافيت بحياتي وخان بيه
الماأظن فد يوم خنته
وآنه طبعي الماتبدل
كل عرض بدماي صنته
عفت حملي إمطَّـشَرْ بـگاع الشماته
وكل حمل مطروح شلته
وكلشي شفته ..
حسبت ناسك توافي …؟
لاﭼـن الناس ابطبعهه كلمن ايستو بخبزته
وخلهه سكته ..
وهذا طبع الناس صدگ
لاتظن واحد يفرحك
وآنه هزني الشوگ ليك .. وجيت انصحك
هوايه يالملـﭼـوم اضحك
وإدفن بگلبك ونينك
وإصبر ودوس اعله جرحك
اضحك .. اضحك
رغم ليل اعداك وهموم
الزمان وطره صبحك
رغم ليل اعداك وهموم
الزمان وطره صبحك
بقلم
ابو طيبة الطائي