لغة العيون
(( لغة العيون))
============ كريم الرسام
الى من كلمتني بلغة العيون..مع الود…..
بقلمي
هواي تأملت بعيونج الحلوات.
كون بكل وكت بعيونج أتأمل.
اتيهن بيهن واوصل لحد الشوك
دخت باخر محطة وماوصلت لحل.
أكو بيهن حجي واكثر من استفهام
واتردد هوايه من أريد اسال..
المشاعر بالكلب تحجيها شفت العين
من حقي من اهيم وبيهن اتوسل.
حلوات وخذني لواحة العشاك.
امشي لخاطرج وبلكشي راح اقبل.
تاخذني الظنون لاخر المشوار ..
من كد ماافكر كمت مااندل.
دليني عليه تهت بالعنوان..
من نظراتج الحلوات كمت اخجل
من حقي ارتبك ماشفت هيج عيون.
وبهاي المواقف صعبه اتحمل
انتي بالحقيقه وبالخيال وياي.
مااحب البراسي كون يتأجل.
اريدج كون انتي بنفس هالتفكير
وعلى حكم القدر لازم اذن نقبل .
وجهة نظر عندي اتمنى بلكي تصير
ضمثل ظلج اصير وبيج اتوسل
مااكدر اسولف ضعالصفات البيج.
لان حتى الشمس من طلعتج تخجل
طبيعي انتي بجمالج شاغله الصوبين
بعيونج بديت يجوز مااكمل .
قارورة عسل لو اريد اوصف بيج.
ولأن طبعج عسل ما اعتقد ينمل.
أعيونج والشفايف والشعر والطول
كل هاي الترافه وطبعج معدل.
حلوات الشفايف جنها جورات.
من حقي من اسولف بيج واتغزل
من اصفن عليج احساسي بيج يصير
واذوبن بيج وافتر فرت المغزل..
هسه انه بوضع لاطاير ولاحاط.
بس انتي بحياتي وعندي انتي الكل.