شنو الغيرك
(( شنو الغيرك ))
بقلمي ،،،كريم الرسام
ليش تغيرت مو كتلي وياك.
باقي وياك مهما تدور الايام
صدكتك واجيت وامنت بيك
مو معقوله هيج تكون الاحكام.
مو انته البالي الجان وياي
كبل مااكول تبصملي بالابهام .
أريد كون واضح من احاجيك.
وشعندك عليه بكلبك شضام.
ليش.. بذكرياتك مالي اثار .
ويمكن مااجي ابالك بالأحلام.
طبيعي هالوكت تحكمنه الظروف
والما يوفي طبعا راح ينلام
عفتي بهيج حاله ماكلت ليش.
وكل اللي براسي جانت الاوهام.
هسه أدفع ثمن كل هاي الاخطاء.
وصرت بالتالي انه الجنت كدام.
اذا تسال عليهن مو قليلات.
ومعدل جبتهن فوك الحزام..
وهذني البظهر كلهن جديدات .
طعنات السنه مو مالت العام..
بعد ماسومرن صدكني للان.
هذن شاهد يظلن طول الايام .
وكيحات وابد مايفيد الضماد.
لان خنجرك جان وياي تزكام.
مااريدك تجيني بعذر وتكول.
تهت بين الحقيقه وبين الإيهام ..
لاتكي اعتذر مو انته مقصود.
لان هيجي الحجي صاير هالايام.
لا ترامي الحجر وتنام مرتاح.
اذا انته حياتك بيت من جام.