ليش تغيرت
(( ليش تغيرت))
بقلمي،،،،،،،كريم الرسام
مامستوعبها تكدر انته تنساني
لان عند سبب هيج احجي خلاني
ولا قبل اصيرن بين هاي وهاي .
بين حجايتك مابين عدواني ..
تدري البينه مو سهل يبن الناس.
يمكن صعب راح يكون خسراني
انته الراح تخسر والأمر معروف .
مو ياهو اليجي يلعب بميداني
اقنعني بعذر حتى أكدر انساك.
ومن هسه اكلك روح وانساني.
شتتوقع اعذرك واسكت اعله الصار.
لا تشككني حتى بديني وايماني.
تره البينك وبيني مو سهله تنساه.
ولا تكلي ظرف والوكت وازاني.
مشكلتك بعد تتصرف انته شلون
والنهر المحبه… يعود جرياني
على ياهي من اعذرك ابدي كلي منين.
مو معقوله احد يعذر الجاني.
هسه انه الضحيه وطلع بيه الصوج.
بسبب صحوة ضميري وطيب وجداني..
لان ابيض كلب ماعندي غش وياك.
خليت الكلب من عندك يعاني.
اذا فعلا اعنادك يبقى هيج وياي
طبيعي بغير واقع راح تلكاني..
تدري البشر طاقه والصبر محدود.
ولا معصوم خاطر الزم الساني.
انه خايف عليك يخونك التعبير
كلش مو سهل من انجرح اني
تذكر من كلتلك نبقى انه وياك.
كل واحد البينه يكمل الثاني.
ولكن للاسف ماجني احجي وياك..
كلماتك صداها لهسه باذاني .
صعبات من اسولف ابد مو
هينات.
يتعجب حقيقه القاصي والداني
مااعرف شجاك شغيراك وليش
وعجيب بلا مبرر تنكر احساني
راح اسكت وأسد باب العتب وياك
واضحك بالجذب واخفيهن احزاني
اغض النظر عنك روح الله وياك.
وي غيري أذا ترتاح شمتاني..
انه انطيك كلب صر.. مهر مامجيوس
وتنكر هذا كله تكول شنطاني.
بس كلي شيقنعك حتى اكلك صار.
وانه مشرعه بقت للان بيباني.
اذا تبقى بغرورك انتي هيج وياي.
حتى بالحلم ….ماراح تلكاني ..