لاضفافٍ تستضيفَ دخانَ الروح
. لاضفافٍ تستضيفَ دخانَ الروح
. سفر دخان
مد شوفك سفر دخان حد المامش اوي العين
حد آخر صفار البيك باگ امن الخضار اسنين
واردس فوگ صدر الغيم … فوگ الضيم
فوگ اعروگهن بهداي فوگ الجاسن الستين
طش شوگك خلگ عرسان
يم آخر محطة شيب بس جمر الظنون اتبيع
يم آخر نواعي الليل
يم آخر نظر مغشوش ٠٠
من يشرب سراب الگيظ
يم وادم….. ولابيهم طعم وادم
ولا مزنة صدگ بيهم
ي تاهو وي ضمير التاه وين الگالهم عنوان
مد گيظك عطش سبّاح وانزف كل سمار البيك
حشّم صبر المتانيك
شموازيك ٠٠٠٠٠٠٠
درب اولايتك مسكون ترگص بالثنيه أشباح
شموازيك……! ذب ثوب التعب ورتاح
واتيمم رماد وخوف من كون المناجل ماي
چمدوب الضلوع أوتار وسنينك گصب للناي
چمدوب الغنه ايبچي البلابل شوگ
ونته ابكل حزن ملاّح
ونته ابكل مهب مرواح
حط ايدك ابچف الريح ٠٠
لو شفت المنيه اتلوح
واكسر واهس السفان ٠٠
وتوضه ابنهر مذبوح
واشرب ليلك ابكاسين ٠٠
وافطم كاسك اعله النوح
ماريدك تظل مصلوب
چف حنه اعله خد الباب
ماريدك شمع منذور
يضحك…. والحلم چذاب
رافگ سچة الجناز ٠٠٠
وإلچم جرحك إشما طاب
تدري اشما تزيد الآخ … تكبر هيبة العطاب
بقلم
كاظم العطشان