سر جمالك
((سر جمالك ))
=============،كريم الرسام
العيون هي لغة القلب وسر جمالك عيونك العسليه ..لك اكتب
بقلمي
مدري شلون اوصفك حلو وبيك احتار
لذلك مااعرف منين راح اختار
من عيونك الحلوه المدري من يالون
كل هذا الجمال انوب هنه اكبار
كلك على بعضك كتلة من الطيب.
ويمكن ما انصفك لو كلت جمار.
نعم شكلك طبيعي مقتنع شتكول
ولكن بيك… حالة تلفت الأنظار..
مرات اشتبه لمن اسولف بيك.
واستغفر واكولن بكلبي ياستار..
يجوز من ارد اوصفك اختلف وياك.
كل البيك ربك كدراها اكدار
مثل طلعت شمس مرات اشوفك هيج
اعتقد حتى الشمس من عندك انته تغار.
اشوفنك ملاك وتمشي فوك الكاع
كلمات الوصف يمك احسها ازغار
لان دافيء وحلو بكد الصفات البيك
لذلك شي طبيعي بيك جنه ونار
عنك من اكولن حلو مو غلطان.
متاكد واكولن هالحجي باصرار.
من كتلك حنين يجوز عندي احساس
من شفتك بعد ماادري بيه شصار
مدري منين جيت وصرت بالدلال
وخليت الفكر وياك ظل محتار..
سهل مرات اشوفك مثل شرب ماي
ولغز مرات اشوفك بيك كومه أسرار.
تعجبني حقيقة عيونك الحلوات.
سر بيهن عجيب منين مااندار..
يبو طول الحلو كلش حلو بممشاك
تتناثر عشك من اي كتر تندارد..
لذلك مااعذرك من تروح بعيد
ومااقبل تجي منك فقط اخبار
احتاجك لان مااصبر بلياك
مو سهله من اصير بخاطرك تذكار
ابقه انه وصفنتي نصير راحة بال
وطبيعي بغير شخصك انه اظل محتار