يوم مع انوار عبد الوهاب
يوم مع انوار عبد الوهاب
چانت بالسبعينيات عدنا شركة النفط الوطنية ( قرب الجسر الجمهوري حاليا فيها بناية يقولون لمجلس المحافظة السابق) …. كان كل تموز ، هذه شركة النفط الوطنية تستدعي مجموعة من الفنانين فاضل عواد رياض احمد سعدون جابر حميد منصور انوار عبد الوهاب ، حسين نعمة ، وكان الدخول للعوائل ، ولكوني من الشبانة عوايلنا بسطاء ملتهين بالبساتين والزرع ، وكنت طفل في الخامس الابتدائي حافي القدمين طار الحرثة وبريسم صفت رجلية ، وقفت في مدخل الشركة واكسر الخاطر ، والشرطة كلساع تطردني ، لمن اجت عائلة المراة سافرة وزوجها لابس قاط واولادهم لابسين قوط ، رحت كتلها خالة دخليني وياچ ، نبت وگالت ولك انت الملح وحافي ودشداشتك ال ركبتك شگلهم هذا ابني شوف ولدي وشوف حالك ، هزت ايدها ودخلت وتركتني والناس مجمهرة بالباب محد يدخل وشرطينا ابو اسماعيل كانت مكانته هيبة وظليت وانه بغير شاطي انتظر السفان ، وسمعت الحفلة بدت مقطع الاول من الكوبلية وانهاريت …. اتقرب للباب واتذكر الصوندات السود مال الشرطة بظهري الها نيشان واگول: شما زعلنه نگول للوادم رضينة ، وهي هاي گلوبنا العمت علينة ، وحزنت وبعد مابيها اكول تهون ، وهناك اجت امراة لابسة عباية وزوجها ابو فاط ، واتقربت الها ، كتلها خالة فدوة دخليني وياچ ، ضحكت هي وزوجها ، ولفتني بعبايتها ودخلت ، وهي ركضة وهي فرحة وانچبح واكوم ، ورحت گبل على البهو ولگيت وشفت كل المطربين ، واحد يسال رياض احمد يگله رياض غني محمداوي ، رياض گال شلون اغني محمداوي والعمارة هي من صنعت المحمداوي ، تقربت يم انوار ، صاح بية موظف وگالت تعال شرايد مني ، شفتها سافرة ولابسه ثوب حمر ، من يابلد جايبتة يم ثوب احمر ، روحي نطت ماشفتچ يم ثوب احمر ، كتلها غنيلي
عمد ارد اتيه الروح ؟
گالت تعرفني انا منو
گتلها ؛ انت انوار
گالت بيتكم تلفزيون ؟
كتلها عد جيرانه
گلتلي انت شايفني بيت جيرانك
كتلها اي والله التلفزيون يشبهچ
وبعدين انشحتت وانا وانا من بين اهل القوط والافندية انتظر يمتة بجي دور انوار عبد الوهاب وتغني اغنيتي الاحبها
لكن من طلعت من البهو ورادت تصعد المسرح شفت نسوة وصبيات صاحن انوار اريد اغنية دادا حسن وضحكت وياهن انوار ، لچن غنت دادا حسن ، وبعدها غنت من عمري سبع سنين وگلبها مهموم ، بس گلبي اهم منچ يا انوار ، ايست روحي وبعد ماكو ظنة
المن تعلگين الشمع
والمن الحنة
يرويحتي چنة الحلو مل وجزعنه
للدوم عينچ عالدرب
عذبتي وياچ الگلب
وانا اللي جربت
ودليلي من الهوى
تاب تاب….. خلصت انوار من الغناء لكن الجمهور صفكولها وصوفرولها يردون بعد اغنية بينما انا انسليت وعدت بادراجي انسحب وصلت الباب حتى اطلع لچن سمعت موسيقى
عمد ارد اتيه الروح
وبعاصف الريح
بلچي على نزل هواي من يصفن اطيح ……. ياهلا
ريت الله لاينطيك يالصحت باسمه
فرفرة الملهوف گلبي شيلزمة………….. ……. ياهلا
ربي استر على هواي من ممشى الغروب
جاهل واخاف عليه موساحگ دروب
ياهلا 
وره الغناوة ارد اردود اركض وعاض دشداشتي ومعرد ، هاي الركضة تشبه تلميذ المدارس من ينطونه شهايد ناجح هاكثر يلتم فرح بيه ويدخل الدربونة شبه المرعوب ويصيح بصوت عالٍ ناجح ناجح ناجح يفزز اطفال الرضع من نومتها وكل النسوة يطلعن يهلهلن ، الا. اني طبيت الدربونة اصيح شفت انوار عبد الوهاب صدگ وصدايگ وغنتلي عمد ارد اتيه الروح
لچن بقت روحي تايهة بعاصفة مانزلت بنزل هواي ،
هم انت مثل العين مااگدر انهاچ
شو كلچ تگبين من يگبل اهواچ.