كوثر أمنيات
كوثر أمنيات
مدخل الروح القصيده ….. بحث عن ريحة وطن
في تجاويف الخيال الشرعت ممشه السفن
وطفله بأحضان الرصيف……. وتشتهي اتنام بحضن
تبتدي بمرود رسم لون الحرف
بسومر وتفسيره مرعب…… احمر بنگاط دم
والجفن دولة عدل
الطيف چن لاجئ سياسي
وديرة عيونك وطن
وروحي عصفورة براري
ابلا نداوه
وبقوانين المسله………. الطيف جَن
ياحلم مهدي المماتي
يل وجودك….. كرسي شاغر……… شاخص بمسرح حياتي
مستند دمعة جرح
وخارطة ابعاد فكري…… تحلم ابطون اليتامه وويه الخبز تعلن صلح
الشالت وشالة عمرها………. گبل لاصور الاله
ينفي حوبات الملح
حوبة النمرود بچفوف الرعيه
الصفگتله وصدگ بروحه اله
وهنه اضن نفس الچفوف………. السوٌن الساسان مجده وذبحن ابگاعي الصبح
قيمة السيف بقدر چف التشيله……
وقيمة الورده الفلح
وآنه حصلت الوطن بس فكره مو حق……
تقوده والتعبير طبعا مو مجاز..
چف حرامي وچف قبح
الانوناكي
اليفرض بسومر سطوته…… يعبث بفكر الفراشه
وينفي عبد الله ذبيح
رب جديد….. بسَمْ جديد……..ايقدس ابواب الملاهي ويكفر برب المسيح
وضرب من بعض الجنون
امنيتي الاگي السندباد…. بلكي بسفاره يصادف
مارد المصباح…… عفريت المنايه….. بلكي جنيت امنيات
حتى اگله انت ياتالي امنياتي…… امنيتي اعيشك من جديد
وارسم بوجه المگابر… ضحكه وبنشغتها عيد
حته ارد روحه البناته… كلمن انكتبت عليه كلمة شهيد
واترس الدنيه هلاهل…. من اشوف بگاعي نورس…………….. عاشگ وبومه يحب
كون اشوف انفاس ريتي…… بدال دخان المفخخ…. بيها ريح الحب تهب
والفرات ايناوش العباس چفه…… ويحز نحر العطش روجه…….
وزمزم بثغر اليتامى وكوثر الزينب يصب
امنيتي اعيش بنص وطن مابي رقيه
ومثل حيدر كون بي قائد عذب
بقلم
احمد الفراتي