سمل شاعر
سمل شاعر
بليلة من ذيچ الليالي البيهه ملچ الموت عثرة لكل رضيع
البيهه صوت اليوم عبر كل ربيع
البيهه واحد يشري روحه والخلگ تصرخ تبيع
سمل شاعر
طرگ بيك وگطف سومر
وعينه عالرازونه هلبت
تثگل الضلمة وتخفف مشتهاهه
لشبگة رموش الشمس
ينثلم باله ويشم البيك بلكت يلتحم
والتحم باله وتطشر بين باچر بين أمس
بين باچر تنگطع لسن الهلاهل
يكتل الفرحة الهمس
بين زلة جدم خاضاهه بغباوة وابتشر شامت امس
سمل شاعر
طرگ وحشة چلمته الصدتها حيطان الملامة
نهّم من يسفت جگارة يچوي اصبعه
وتگعر بريته القيامة
شهم
من يفرغ البيك يترسه من چبدة ويتّمه بكل تمامه
صعب لو ينشاف سنه
راهنوا فنهه تلچحه عيون زرقاء اليمامة
نغم يطلع من دهاليز السوالف
حيث لو رتل غربته على الحمام
ينزرع وادي السلام بكل حمامة
سمل شاعر
خضّرت بچفوفه حسرة
ورفض يصفگ گطع چفه
ورفض يكتب ذلته وسطوة غربته گطع چفه
نزل دمه وكتب بيت على التراب
ضلمة السرداب مأمن للضرير
بازة المعتار سلطان الحرير
الشاعر الينگطع چفه
العلگمي لازم يفيض بكل شطر
الشاعر الينگطع چفه
ينتفض دمه عله سچين التجبر والقهر
الشاعر الماينطي فتوة بكل قصيدة
هذا مو يم الشعر
سمل شاعر
گطع چفه وبده چبده على الخمر
وبده روحه على المراره
مات بس ضلت شراره
الشراره الخلت گطوف الجكاير
يعصف بطيها الخريف ….ماتموت
الشرارة الخلت جعير المخاوف
بس وحيف …..ماتموت
الشراره المات صاحبها بشرارة ماتموت
الشاعر
زين العابدين فائز