سورة الحكمة | رضا عبد النبي نُوح
شاعرة | مصرية
خلينا للمرة الأخيرة ننتصر للفكرة
بس مش مهم الحبكة والسرد وخلافه
خلينا نختتم الحكاية وإحنا لسه ف جوفنا شوق
خلينا ننتظر المصير بصدر أرحب من كده
وعيونا بدل الدمع تضحكنا بهداوة
نستطعم الفُرقة تحت تصنيف الغلاوة
ننمحي في وقت ترتيب القدر
وننكتب عكس الظروف
نختذل صبر الطريق اللي انهدر وننفرط ويا الحروف
ونمد ف أحلامنا الجديدة ونغني للوقت بسلام
ننزوي يم مراسينا البعيدة والعمر يحتضنه الكلام
ينشق في جوفي الحجر وأصرخ وأقول:…
يتفرد في وسع هذا الكون رصيف يسمح لي أمشي لك….
أوصل على باب اللقا وأستسمحك تخرج لي من علم الغياب
وتجيني على باب الوصول وتشق صمت المعضلة
ف الأولة
ترقيني من جور الزمان ومن ظلم الحكاوي للمِفارق
ومن غيبة العقول
ف التانية
تمسح لي أزمات الأنين و تهديني للحِلم المُبين
وترد لي جوفي اللي بات مستباح
ف التالتة
تفتح لي باب ع الصبر وتوصي كل الأتيات عني
وتنقش لي من الوحدة آيات للجبر
ف الرابعة
تبني لي ف الغربة سبيل وتسرق لي من عقل المستحيل فكرة
وتصب لي من جُعبتك حبة أمل
ف الخامسة
كل اللي فات مش محتمل!!
والسادسة والسابعة
رد لي نفسي اللي كانت وادعة
والتامنة والتاسعة
هبني سِعة
وامهلني أستوعب هطول الفاجعة
وأرزقني حكمة كل اللي سبقوني ف هواك
والعاشرة
ارقيني من كل المهلكات
إلا سواك…
