القيامه
![](wp-content/uploads/2021/11/IMG-20211122-WA0292-scaled.jpg)
القيامه
تريد الله؟
تحبه…؟هم رايد تشوفه؟
اني ادليك بمكانه!
لاتطوف الكعبه…طوف بحي فقير
اهناك بعيون اليتامه گاعد الله
اقره أي آية خبز يركض دمعها
چن ملاك
بيده ورقه وبيها مرضات الأله
ايصيح هاك
مدلي چفك
السياسي الباگنه اتعناله زمزم
وبين سعي البير والدولار مهتم
عشعش ابليس بصلاته
حمره سجادة صلاته
امطعمه بدم الفقير
البرلمان درك ثامن الله خلاه ابجهنم
الله مافعل نظامه
منتظر يوم القيامه
وآه ياطعم القيامه……. بموطني ماط بلثامه
الله زاحوا عن مقامه
وقدسوا مفتي تهامه
وياكثر دمع اليتامه
الدمعه بعيون اليتيم اتصير سيف
ياكل بوجه الحلم
الطفله من اتبات لعابه بحضنها
اتصير ام
امي من تدعي اشوف الله يجيها
اتفرع الدمعه اعله خدها
ايكلها هاج
كفي دمعج ………تضحك عيون السياسي الباك ابنج
وقررت اوبك علن سعر النفط
يعني برميل النفط سعره شهيد
الله لو رايد يعيده
ايخضر بكل قطرة عاشگ
اليموت ابگلبه حسره اعله الحبيبه
شرعاً اعتبروا شهيد
الله كال
الحب مقدس
التراب البلجرف والماي خوه
اثنينهم عشگوا وطن
من تموت الگاع يعني النهر مات
الحب مقدس
البلبل ايحب الصبح
النجمه تكره كل ضوا
هذا حالي وحالك وحال السياسي
الخرسه فرحانه لان ماعدها صوت
العنده صوت
وما يگول الحق هذاك
هذا شيطان رجيم
والسياسي……. اذنه طرشه
وروحه هشه
تموت يم دگ الحديد
بقلم
احمد الفراتي