دكتورة لبنى تكتب في العشرينات

 

في العشرينات

بقلم / دكتورة لبني يونس

⭕️ شغل ١٦ ساعة عالاقل .. فكك من جو الوورك لايف بالانس ده .. العشرينات هي قمة صحتك و عطائك افرم نفسك.

⭕️ احترم طبقتك و بلاش تقول كلام طبقة غيرك .. عشان تقدر تخرج منها و توصل للطبقة اللي فوقك .. فا بلاش تقول حجج و أعذار ناس مرفهة انت مش منهم (توكسيك وورك انفيرومنت .. بوسيتيف ڤايبس .. كوربورت سلييڤ) طالما ابوك مش مليونير يبقى ركز في شغلك و بس

⭕️ بلاش مشاريع في الاول .. و بلاش جري ورا تايتلز مش حقيقة ال CEO مش نهاية العالم

⭕️ ما تتجوزش بدري .. الجواز بدري عادة بيعطل .. و دايما بيحطك في حالة صراع من اجل البقاء .. و بيقلل قدرتك على المجازفة

⭕️ اقفل الانستجرام بتاعك لمصلحتك

⭕️ الانجليزي بتاعك لازم يكون احسن من العربي

⭕️ لو عايش في الاقاليم اشتغل سنتين تلاتة بالكتير في الاقاليم و بعدها سيبها و روح القاهرة ..

⭕️ الشات جي بي تي .. بقى زي القراءة و الكتابة، مش اوبشن انك ما تعرفش تشتغل بيه و عليه

⭕️ لو ها تطلع الخليج لازم قبلها تشتغل لك سنتين تلاتة في القاهرة .. القاهرة مفرمة و مدرسة اللي يسلك فيها يسلك في اي حتة في العالم

⭕️ اياك و التحويش او الإدخار او الاستثمار في السن ده .. في اي حاجة غير كورسات عملية تطبيقية

⭕️ بلاش MBA .. ركز في الكورسات اللي مدتها شهر فا اقل .. و يكون اللي بيدي الكورس ممارس للشيئ بايده .. ال MBA لو مش مطلوبة عشان ترقية محددة يبقى ما تضيعش وقتك فيها في العشرينات

⭕️ احضر ايفنتات كتير .. و اسمع فيها قليل .. بلاش حماس و بلاش تصدق كل اللي بيتقال .. انت رايح من احل التغذية السمعية و البصرية و العقلية

⭕️ في المعادلة بتاعة مرتب ولا خبرة .. دايما اختار الشغل اللي هيديك خبرة أعلى

⭕️ مرواحك الجيم مش رفاهية .. ده اهم من الاكل و الشرب .. راس مالك هو صحتك و صفاء ذهنك

⭕️ قلل اصحاب .. زود معارف .. نصيحة تقيلة بس صدقني اكتر ناس هتعطلك في الفترة دي هما اصحابك.

⭕️ تقبل ان العشرينات اتعملت عشان تلوش فيها .. مفيش حد في العشرينات بيبقى عارف هو عايز ايه

⭕️ جرب كتير .. افشل كتير .. جازف براحتك .. تلاقي التلاتينات رايقة

⭕️ ما تسمعش من اي حد ما وصلش للي انت عايز توصل له .. فلتر الكلام

اهم ما كتب عن التنمية البشرية وملخص تجاربي في العمل مع شباب معظمهم في العشرينات

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى