بلا تعب بدلو الشعب

*خاچيات* ..

*بلا تعب* *بدلو الشعب*

أ.د.ضياء واجد المهندس

تگول (خاچية):
اني واگفة بطريق العمارة بمفرگ شيخ سعد ،واچت سيارة من النجف ،انگلبت يم المفرگ. تگول خاچية : احنه الواگفين اخذتنه الغيرة وركضنه نريد نطلع العبرية، خاف حالتهم خطرة ،ميتين عدلين ؟؟؟؟!!!..
تگول خاچية:وصلنه للسيارة باوعنه ، لگينه العبرية ما بيهم شي، كلهم واعين بس مضمدين ،الشاد ايده والشاد رجله والشاد راسه .
تگول خاچية: صلينه على محمد وآل محمد، وصحنه سبحانك ربي يمكن الملائكة مضمدتهم لأنهم مؤمنين بعد زيارتهم امير المؤمنين..
طفر علينه شايب من العبرية ، گال :عمي يا ملائكة و يا مؤمنين، هذا سايقنه المسودن من النجف ليجاي هاي خامس مرة يگلبنه..

شاهد سالفتنه :
شعبنا شبع گلبات ،و هم يرجع ويصعد بنفس السيارة، ونفس السايق..
من اچت الشرطة ، گلنالهم :عمي كافي بدلوا السايق!!!، و بدلوا السيارة!!! ،غيروا طريقكم إذا بقينا هيج كلنا انموت والسايق يبقه مجلب بالستيرين .. إلى متى؟
الشرطي گال : الاسهل انغير العبرية ..

البروفسور د.ضياء واجد المهندس
مجلس الخبراء العراقي
2011