كافي ياشعب
كافي ياشعب
نايم يا شعب مو خوش نومه
شو ساكت على هاي الحكومه
لاتسكت على الذله
اذا حر الحياة احله
اليموت بشرف محد يلومه.
*******
نايم يا شعب متكلي لاوين
انهض سوي ثورة بشكل الحسين
كلشي بوكته بس لاتكول بعدين
الفقر والجوع والذله البراهين
صيح بصوت هيهات
ابد عالذله لاتبات
وي كل باطل تكون الخضومه
*******
بحقك يا شعب لازم تداعي
كافي من السكوت وصير واعي
نبقى بهل الوضع مالها داعي
لان انته الرعيه وانته راعي.
اذا تسكت على الصار
لازم تدخل النار
لان كلشي بسعر لازم نسومه.
*******
بسك يا شعب كافي تجامل
الباطل تصيح بوجهه باطل
بعد مايجوز تسكت على العايل
ولازم بيدك أتعدل المايل.
كافي من الخسارات
عمر خلصته اهات
والبيه الكفايه يعزه كومه
******
كافي يا شعب للعظم وصلت
واضح هالحكومة بكلشي فشلت
على باب الفساد هواي دكت
عن حال الشعب مايوم سألت
نسمع بالنزاهه
خلونه بمتاهه
هواي تجاهلت حقنه الحكومه.