ارد أكتب…
![](wp-content/uploads/2022/06/405E4BBA-0DE1-4C04-997D-31B21827D959.jpeg)
زهير جبر التميمي
گالولي الكتابه
تنبع من الروح
گلتلهم نعم
بس أبعد شويه
باوراقي الكتابه
تصير صفرة لون
وتتغير ملامح
ورقتي شويه
من أسمع مريض
يعاني باخر كون
أحس أني مريض
وعلته ال بيه
وافرح من أشوف
إثنين فرحانين
اشاركهم فرحتي
بلمسه حنيه
ومشت الدنيا بينه
بين حال وحال
راوتنه الردي
والصافي النيه
مثل سكة قطار
لغربة متوجهين
مشينا بلا وعي
وبدون خرچيه
كتبنه أعله الحياة
أجمل قصص بالكون
عن معنى الوفاء
وعن معانيه
عن سيرة عمرنا
وسيرة الطيبين
عن أشخاص
عن كاظم الساهر
عن أغانيه
وعن جروح ماطابت
لحد الان
كلما مر عليها الجور
تصرخ آه ليليه
لان طبع الألم
يفز توالي الليل
ويفزز جروح المرت عليه
وارد أمسح تراب الاه
واعاين جرح مابيه
بس بروحي اتألم
واحس گومة حراميه
باگو فرحتي وراحو
عراقي وتاهت عليه
وارد أكتب
عن قانون غربتنه
عن حاكم مودتنه
عن مسكين عايش
وي جرف الماي
يتأمل حكومتنه
هم بيها أمل
وتعيد وحدتنه
وارد أكتب
عن أطفال محرومين
عن غنوة وطن مذبوح
عن جروح ماتلتم
عن حيدر شهيد الوطن
عن أمه وألمها
المابطل ونها
عن هوسات أبوه
وحسرته ودمعه
عن عگاله من خلاه
فوگ العلم
واتنومس حدر أبنه
وارد أكتب
عن قانون يذكرنه
يذكر كل مصيبتنه
عن دهلة شلبنه
وعنبره المحروم
عن ناعور دجله
الواگف المكسور
عن ظلم الفرات
وكسرته وعطشه
ويزاعلني القلم مرات
من أكتب نواعيه
من أذكر طريق الشوگ
من أكتب سبب موتي
ذاك المنفهان بروحي
لسه يفيض
بچروفه عشگ
وبروحه حنيتي
وارد أكتب..
عن أيام غربتنه
عن غبشة فجر
متاني صبح العيد
عن خاين وعد
ويگول شعليه
عن لحظات فرحتنه
ال مشت لبعيد
عن ظلمة وطن
محبوس من زمان
والسجان من نفس الحراميه