مـسـافر
![](wp-content/uploads/2021/12/IMG-20211209-WA0065.jpg)
مـسـافر
أمشي وطريق العمر
حرّم خطاوي الأمل
ألاّ بحلم كافر
مسافر وأشوف الأمس
وجهه اعله وجهي طبگ
وياي ومسافر
فزّز صوّر رحلتي
زتّوني مثل السرب
حد عتبة الحاضر
طفل الأمس ذاك أنا
بعيونه أثر للفرح
فوگ الرمش عابر
بس مو طويل الأثر
واضح گصر عشرته
چم خطوه ومهاجر
يمكن وجع فرهده
والقدر يم دمعتي
كاس الضحك كاسر
وداسوك .. ها .. ياعمر
خمسينك أتفرهدن
وليا غنّه تناطر
خامس تعب لافته
ما حملت بحس فرح
سكّت گلب عاجر
ضاع الرجه ولا رجع
وأحنه أوي ليل الدمع
ساعاتنه نكاسر
نظفر سواجي الوهم
نترس حضنهن حلم
ونبلل الخاطر
وأشكيلك من اليجي
من باچر و باچر
باچر تجينه الشمس
وبلا گصيبه النهر
ويفل سواجينه
تنّور زند الصبح
يعصر سنين النده
ورماد ينطينه
يسولف علينه العطش
صيف وظهر بي وكح
يفخر وجه طينه
وذيچ أعله شفة الجرح
أسمعها ما تنمسح
غنوه لسچاچينه
باقي أثر شوغه بحلم
يرجف وأذا ما رجف
ترگص سوادينه
يلتفت بلكت وطن
يشمر بهذا الدرب
فيّ …يعتنق دينه
چا ضحك ياس الرجه
وشال البخور وشبگ
شمعه وصوانينه
چا ظل وحيد الحزن
بين العطش والندى
وصفنت درابينه
بس يا حسافه القدر
للرحله خط لافته
وشرّها بعناوينه
وصّفت تالي الدرب
كل التذاكر حطب
تندل .. دواوينه
بقلم
جواد الدراجي