آنه او واهس جهالي ..

 

حاتم احمد الهاشمي

وأمي،،،، والجيران

نعيش أفكار مختنگه
وخلگ عمري ال تعده وفات
ال طلگته الف طلگه
والآهات..ول اللچمات .. . والصفنات
ولساني ال جبر يختار
بس آلاه مستنگه
وقهر گلبي اعله شعبي الضاع
بين الكاتل ومكتول
واحس عليه بالشفگه
من نعله اعله ابو البترول
ال جاب الغازي والمسؤول
لابو النت على الحاسوب ع المحمول
على التفكير والتكفير والتهجير
على المعلوم والمجهول
على الجوع الاكل
من حيلي كوم سنين
حد ماطبگ
جلد البطن ع السنسول
اختلفنه بكل وصاة الله
بالسنّة ….. النوافل
باللغز.. والنوب بالمحلول
بينه النار معتلگه
نعيش بغربة وبفرگه
نعيش بأمل عل الملگه
اخوك يرش عليك الزيت
ويشوف النار معتلگه
اخوك ال چان امس الفات
تحس ابفخر للرفگه
اذا عافك ثلث ساعات
تشوفه اتحضنه وتشبگه
خنجر بيده جاك اليوم
يريد بصدرك يدگه
وجيران ال چنت
تتسامر انته وياه نص الليل
الباب بوجهك يطبگه
حرت ياهو ال اماشي
وچني بمحان
الوطن حاير يربعي واني حيران
گمت اخجل اگول فلان
أخاف فلان يطلع ناكر الرفگه

گمت ،،، ضحك الوان
مره الضحكة صفرة تصير
وعلى شفتي تموت احيان
تموت الضحكة مختنگه
تطلع ضحكة بس زرگه
يسألوني جهالي اعله الوطن وشبيه
واحتار شأجاوبهم
أكَلهم ضاع بالصفگه
ندور اعليه مانلگه
جواب بحلگي ما الگه
ادري الوطن يوسف صار
وأدري العيب بلخوان
وأدري الحاك هل دگه
بريء الذيب اعرف زين
بس تهمو چذب حلگه
واعرف من حفرله البير
قميصه وادري من شگه
واعرف ليش هل يشگه
ومحتار وشجاوب عل سؤال الفات
وافشل فشلة التفگه
من تفشل بوكت الكون
بحلگها وتدگس الفشگه
يشعبي شبيك ميكفيك
جرحك موصفه شغمگه
شعب عايش على الازمات
والجويات …. والهبطات
متعود على الصفگه
لحد ماطمّع الحكام
باگو گاعه والنفظات
واكلو حگك وحگه
هزو جذع ابو النهرين
موبس الرطب لموه
افترو على البستان
ماخلو ولا ورگه
يبو نهر الفرات ال چان
يومك عيد،، شهرك عيد
سنتك عيد
يلمجروح
وين انروح حتى نروح
ددليني بعلاج يداوي جرح الموت
ددليني اعله درب ابعيد
دلي الجدم خله يفوت
اريد اشهگ ولو شهگه
اريد اتنفس براحة
اريد اخلص من الحرگه
اريد أكل ولو زهدي
عفت البرحي بالبستان
غراب ينگر ابعثگه
اريد اشرب من التنگه
مارايد زلال وآمن ماعندي
ولارايد قصور ودمعتي بخدي
رايد لو صريفة ابلا ضوة ابلا باب
ابشرط تعصى اعله شمس الله
ابشرط ماشافت الغرگه
رايد درب مابيه عوز
يجيب الناس ويودي
مابي أبد بسطية
ولابي شايب يجدي
ولاطفل ايتراجف والوكت كانون
وجفونه من القهر تندي
رايد وطن فوگ الغيم
مايتهدد بقناص
ولا ينلاح بالشلگه
رايد وطن جوه الگاع
وريس كون شاف الموت
يحس شويه بالخنگه
تراب الوطن ماينداس
عيب الفاجر يسحگه
وطنه لياوكت مذبوح
تظل لياوكت تشگه
صبور لياوكت تبگه
بختك وين صيتك وين
تراهو ال مايشور دوم
تصيحه الناس ابو الخرگه

 

تطبيق وكالة الراصد نيوز

احصل على تحديثات في الوقت الفعلي مباشرة على جهازك ، اشترك الآن.

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد