حلم

( حلم )

حلم شفتك
ابعيني وﭼـلَّبِتْ بيك
لاتبعد عليه
وخَلْ احاﭼـيك
يحلم اصباي
يهاي وهاي
أعَّيِـدْ يوم
اشوفَنَكْ وألاگيك
حلم شفتك
ابعيني وﭼـلبت بيك
حلم شفتك
جبير وتارس العين
وحِرْتْ ابروحي
أضمك ..؟ لو أضمك وين .. ؟
يناعور التشيل
اهموم مو ماي
خل حِلْمَكْ يطول
وخَلَّكْ اوياي
تشكيلي اعله روحي
ومنك اشكيك
حلم شفتك ابعيني
وﭼـلبت بيك
حلم ونباگ سكته
وگـوطر ابعيد
وخَلَّف بس سواجي
وبس تجاعيد
علي بهداي .. ينجم اسماي
رسّيني اعله بَـرَّكْ
خايِبْ اشبيك
حلم شفتك ابعيني
وﭼـَلَّبِتْ بيك

بقلم
مشكور نعيم الطائي

تطبيق وكالة الراصد نيوز