فن وثقافة

تابوت الكمر

(( تابوت الكمر ))

ضمني يم ديرة خضارك
ليله گمرة !!
وسافر بروحي واجيك ؟
من عطر شذرك غلاتك
كلشي بيك يريدني ! وبيه اشتهيك
ياغلاتك ؟؟ يارخص روحك اگبالي
بعد بيه اتمايزك بروح خمره
وبعد بيه من الضروف الما رضت تكضيها سفره
اااخ منك !! مدري ليش اتعيش وحدك ..
ومدري ليش الحب يجيك ..
ياغريب المن تتاني
مامش بدين التحبهم خيط رجعه
ومامش بعين التحبهم تفكدك وطيح دمعه
شيل حزنك وحدك
نجمه غريبه وتاني تابوت الكمر
وعيش عطشان بكرامه ولا تاني جفوف تفزعلك نهر
ياحسافه مرايتك ما قرت لونك !!
ياحسافه اتغربت وانته بحضرتك !!
كله منك لاعشت وي النهر ناعور موسم ؟
ولا متت وحدك رساله !
وانه كتلك عيش نجمه الوحدك
والمع بروحك ؟
وخلي كل ذاك السواد يلم حجيهم
واكشخ وفرزن جروحك
فرزن جروحك قصيدة وعيش حزنك
وسكر البوب البقت مفتوحه يمك
ااخ ياكلبي العواذل كلها منك
لا نزل وحي اعله صدرك لاعشت بالغار وحدك
ليش من صاروا ضرف جيت برسالة
يامه كتلك للكمر بس ليل صاحب
وانته بيك عناد وشامة عرب
يفرح كلبه بدمي ينزل

بقلم
محمد جاسم

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى